Dy ditë pas vrasjes së gjyqtares Fildes Hafizi, rrëfehet parukierja tek e cila gjyqtarja kishte shkuar për t’u rregulluar.
Parukierja ishte personi i fundit me të cilën gjyqtarja Hafizi ka komunikuar, para se të vdiste. Në një intervistë për Gazetën Panorama, parukierja tregon skenën që ajo ka parë dhe bisedën e fundit me Hafizin.
Mikesha e viktimës, e cila nuk pranon të identifikohet, tregon se ngjarja ka ndodhur vetëm një minutë pasi gjyqtarja ka dalë nga salloni i saj. Parukierja tregon se ka qenë në dijeni të konflikteve të Hafizit me ish-burrin, mirëpo mikesha e saj nuk dëshironte të fliste shumë për të.
“Bëri thonjtë dhe më pas doli për të ikur në shtëpi. E kisha kliente të rregullt, vinte gjithmonë tek unë. Ishte njeri i mrekullueshëm. Akoma nuk e besoj se çfarë ka ndodhur. Gjithmonë e qeshur dhe me batuta, i bënte të gjithë për vete”- thotë ajo.
PYETJE-PËRGJIGJET:
Fildes Hafizi u vra dje (të enjten) para sallonit tuaj. A arritët të shihnit se si ndodhi ngjarja? J
O, nuk kam parë asgjë, pasi dera ishte e mbyllur dhe siç e shihni, edhe vetë xhami është i veshur me letër e nuk duket asgjë nga jashtë.
Ishte te ju para se të ndodhte ngjarja?
Po, këtu ishte. Bëri thonjtë dhe më pas doli për të ikur në shtëpi. E kisha kliente të rregullt, vinte gjithmonë tek unë. Ishte njeri i mrekullueshëm. Akoma nuk e besoj se çfarë ka ndodhur. Gjithmonë e qeshur dhe me batuta, i bënte të gjithë për vete.
Vrasja ndodhi menjëherë pasi doli nga salloni?
Po, po, menjëherë. Nuk kishte kaluar asnjë minutë. Sa ka hipur në makinë, kam dëgjuar të shtënat.
Dëgjuat ndonjë grindje apo debat mes tyre, para se të dëgjonit krismat?
Jo, nuk kam dëgjuar asgjë. Unë vazhdova punën pasi doli ajo. Zhurmat këtu, tharësja e ndezur, nuk të lejojnë që të dëgjosh asgjë.
Po pasi dëgjuat krismat, çfarë ndodhi?
Hapa derën dhe dola jashtë të shihja çfarë ndodhi. Makina e Desit ishte shumë pranë sallonit. E pashë që ishte e gjakosur brenda në makinë. E kuptova se kishte vdekur se nuk kishte shenja jete.
Po autorin e patë?
E pashë që po largohej me shpejtësi. Nuk mora vesh asgjë më shumë se u bëra shumë keq. U futa brenda, mbylla derën dhe qëndrova këtu derisa erdhi Policia. Jam ende e tmerruar nga ajo që ka ndodhur. Nuk kam fjetur gjithë natën mbrëmë. E kam të gjithë skenën para syve.
A keni dhënë deklarime në polici?
Po, më pyetën. Kaq sa ju thashë edhe ju kam thënë. Nuk di asgjë më shumë.
Ishit në dijeni të problemeve që ajo kishte me ishbashkëshortin?
Isha në dijeni, por ajo nuk fliste shumë për të. Edhe unë nuk e ngacmoja, s’doja që ta vija në pozitë të vështirë. (D.D/Shuplaka)
