Vrasja e Kastriot Reçit, policia ofron shpërblim për këdo që ofron informacion për autorin

Qyteti i Rrëshenit është tronditur ditën e sotme pas ekzekutimit me snajper të Kastriot Reçit, i cili u vra sapo doli nga lokali i tij.

Ndërkohë që po hetohet për vrasjen, polcia ka ofruar edhe një shumë për këdo që ndihmon në identifikimin e autorit.

“Në lidhje me ngjarjen e ndodhur  sot, rreth orës 11:05, në afërsi të një lokali në Rrëshen,  Mirditë, ku në rrethana ende të paqarta u vra me armë zjarri shtetasi K. R., 47 vjeç, Drejtoria Vendore e Policisë Lezhë, për çdo informacion të saktë që do çojë në zbardhjen e ngjarjes, identifikimin dhe vendndodhjen e autorit vë në dispozicion shumën 2 milionë lek të rinj.

Kushdo që mund të ketë informacion të vlefshëm, të telefonojnë në numrin unik 112 dhe në numrin në dispozicion për këtë qëllim 069 41 06 449, duke ju garantuar anonimat të sigurt dhe reagim të menjëhershëm.

Për zbardhjen e kësaj ngjarjeje është ngritur grupi i posaçëm hetimor, me specialistë nga Departamenti i Policisë Kriminale, DVP Lezhë dhe Komisariati i Policisë Mirditë, nën drejtimin e Prokurorisë dhe vijon puna për grumbullimin dhe administrimin e çdo prove sado të vlefshme që do t’i shërbejë hetimit.

Në ndihmë të DVP Lezhë dhe Komisariatit të Policisë Mirditë kanë shkuar disa grupe të FNSH Shkodër dhe vijon krehja e zonës, me qëllim kapjen e autorëve.

Ndërkohë, është bashkëpunuar me DVP Shkodër, Tiranë e Kukës dhe Policinë Kufitare, për të shtuar kontrollet në akset rrugore dhe në kufirin e gjelbër, me qëllim parandalimin e daljes  jashtë vendit të autorit/ve të dyshuar.”- njofton policia.