Vrasja e policit në veri të Kosovës, Basha: Thirrje autoriteteve të Beogradit të distancohen prerazi nga kjo ngjarje e rëndë

Kreu i Partisë Demokratike, Lulzim Basha ka reaguar në rrjetet sociale për sulmin me armë ndaj zyrtarëve të policisë së Kosovës në Leposaviq.

Basha shprehet i tronditur nga sulmi që i mori jetën një rreshteri të policisë dhe plagosi një tjetër.

Gjithashtu ai i bën thirrje autoriteteve në Beograd të distancohen dhe ta dënojnë këtë ngjarje kriminale.

Postimi:

I tronditur nga vrasja e punonjësit të Policisë së Kosovës dhe plagosja e një tjetër punonjësi ne Leposaviq. Mendimet dhe lutjet e mija janë me familjarët dhe kolegët e punonjësit që humbi jetën në krye të detyrës si dhe për daljen nga rreziku e shërimin e kolegut të tij të plagosur.
Në këtë çast kritik të betejës kundër krimit jemi në krah të punonjësve të Policisë së Kosovës dhe autoriteteve të vendit teksa punojnë për vënien e autorëve të kësaj ngjarje të rëndë para ligjit.
Ju bëj thirrje autoriteteve të Beogradit të dënojnë dhe të distancohen prerazi nga kjo ngjarje e rëndë dhe nga gjuha e aktet destabilizuese.