Dhoma e Avokatëve në Elbasan ka protestuar sot, disa ditë pas vrasjes së kolegut të tyre Ravik Gurra në një atentat mafioz në qendër të qytetit.
Avokatët e Elbasanit kërkojnë solidarizimin e avokatëve në të gjithë vendin, pasi thonë se vrasja e Gurrës është një kambanë alarmi për të gjithë sistemin e tyre.
Sipas tyre nuk ka pasur asnjë reagim nga institucionet përkatëse, ndërsa hedhin akuza dhe në drejtim të Dhomës Kombëtare të Avokatisë, për të cilën thonë se nuk ka pasur përfaqësues as në varrimin e Gurrës.
“Ajo që ndodhi ishte një ngjarje ekstreme. Ndaj reagimi duhet të jetë ekstrem. E turpshme që dhoma kombëtare e avokatisë nuk është sot prezente këtu. Jemi të rrezikuar, një avokat nuk guxon të marrë përsipër një gjyq, qoftëedhe civil. Bojkoti duhet të jetë pa afat jo tre ditë sikurse u tha”, shprehen avokatët.
‘’Nëse do të ishte vrarë ndonjë prokuror, reagimi do të ishte shumë më i madh. Dhoma e Avokatisë nuk ishte as në varrim”, shprehet një tjetër prej avokatëve në Elbasan.
Avokatët kanë vendosur që deri të premten të bojkotojnë të gjitha seancat gjyqësore, ndërsa të premten do të ketë një takim të dytë, për të vendosur ecurinë e bojkotit.
Kujtojmë se Gurra u vra në një atentat mafioz të premten e 22 Marsit, nga një person ende i paidentifikuar që dyshohet të jetë një vrasës me pagesë.
Autori u ndihmua të largohej nga vendngjarja nga persona të tretë, makina e të cilëve u dogj në periferi të qytetit të Elbasanit.
Derimë tani pista kryesore ku po heton policia është ajo e vrasjes për shkak të detyrës, pasi Gurra kishte qenë avokat në disa çështje të rëndësishme, si ajo e Emiljano Shullazit, apo ajo e fisit Çapja në Elbasan.
(E.K/FAXWEB.AL)
Discussion about this post