Vrasja në qendër të Laçit, 3 autorët shpallen në kërkim. Policia zbulon motivin e përplasjes me armë

Policia e Kurbinit ka reaguar lidhur me vrasjen e dyfishtë që ndodhi mbrëmë në qendër të qytetit të Laçit, ndërsa në kërkim janë shpallur tre persona si autorë të dyshuar.

3 identitetet e personave të dyshuar, Faxweb.al raporton se janë Markel Bushi dhe Vincent Busi, ndërsa në kërkim është dhe 23-vjeçari Manuel Bushi. Markeli dhe Manueli janë vëllezër mes tyre.

Sakaq Policia në njoftimin e saj zyrtar për ngjarjen thotë se vrasja ka ndodhur për shkaqe banale, edhe pse burime të sigurta për Faxweb.al bëjnë me dije se mes të rinjve dyshohet se ka pasur një përplasje për pazare droge.

Kujtojmë se dy kushërinjtë Mikel dhe Jani Jushi u vranë në një lokal në qendër të Laçit, pas një përplasje me armë me autorët e dyshuar.

Njoftimi i policisë:

Identifikohen dhe shpallen në kërkim autorët e dyshuar të vrasjes së dy shtetasve, ndodhur  mbrëmjen e djeshme.

Në lidhje me ngjarjen e ndodhur mbrëmjen e djeshme në lagjen nr. 1 Laç, Kurbin, ku pas një konflikti për motive të dobëta u plagosën me armë zjarri dy shtetas  të cilët më pas gjetën vdekjen në një nga spitalet private në Tiranë, Policia ngriti një grup të posaçëm hetimor nën drejtimin e Prokurorisë së Rrethit  Gjyqësor Kurbin për zbardhjen e kësaj ngjarjeje.

Menjëherë sa është marrë njoftimi, në vendngjarje kanë shkuar shërbimet e Policisë së Kurbinit si dhe grupi hetimor. Në vijim janë ngritur pika kontrolli në të gjitha rrugët që lidhen me qytetin e Laçit si dhe disa pika kontrolli në akset kryesore rrugore, Milot -Lezhë, Milot -Kurbin -Tiranë.

Me mbështetjen e FNSH, janë kryer një sërë kontrollesh në banesa e vende të dyshimta ku mund të ishin fshehur autorët, si dhe janë shoqëruar në Komisariatin e Policisë, 23 persona  të cilët u pyetën në lidhje me ngjarjen.

Nga tërësia e veprimeve hetimore të kryera nga grupi i posaçëm hetimor, rezultoi se  ngjarja ka ndodhur për motive të dobëta, pas një konflikti të çastit, dhe se autorët e dyshuar të vrasjes janë shtetasit: M. B., 25 vjeç, M. B., 23 vjeç dhe V. B., 28 vjeç, të tre lindur e banues në Kurbin.

Policia e Kurbinit vijon kontrollet intensive për gjetjen dhe kapjen e autorëve të dyshuar.

Materialet iu referuan Prokurorisë pranë Gjykatës së Shkallës së Pare Kurbin, për veprime te mëtejshme hetimore, për veprat penale “Vrasja në rrethana të tjera të cilësuara, në bashkëpunim” dhe “Mbajtja pa leje e armëve dhe municioneve luftarake”, parashikuar nga nenet 79/dh, 25 dhe 278/1 të Kodit Penal.

(E.K/FAXWEB.AL)