Vrau 11 vite më parë në Greqi, prangoset pas deportimit 44-vjeçari

Është ndaluar gjatë ditës së sotme në pikën kufitare të Kakavijës një shtetas i shpallur në kërkim për një vrasje në bashkëpunim të shtetasit F.K në 2008-n.

Shtetasi me inicialet A.H., 44 vjeç, banues në Fier, është prangosur pas deportimit të bërë nga shteti grek.

Ndalimi i tij u bë i mundur falë bashkëpunimit të Policisë Kufitare në Pikën e Kalimit Kufitar Kakavije, Interpol Tirana, dhe Drejtorinë Vendore të Policisë Fier.
Pas ndalimit, ky shtetas iu dorëzua Drejtorisë Vendore të Policisë Fier për veprime të mëtejshme.

Njoftimi i plotë:
Shtetasi me Shërbimet e Policisë Kufitare në Pikën e Kalimit Kufitar Kakavije, gjatë përpunimit të dokumentacionit dhe verifikimeve të kryera në bashkëpunim me Interpol Tirana, Drejtorinë Vendore të Policisë Fier, si dhe nga të dhënat në sistemin “TIMS”, ndaluan shtetasin A.H., 44 vjeç, banues në Fier.
Ky shtetas ishte kthyer “Deportiv” nga pala Greke dhe rezultonte i shpallur në kërkim.
Gjykata e Rrethit Gjyqësor Fier, në Tetor të vitit 2016 ka vendosur masën e sigurisë “Arrest në burg”, për veprën penale “Vrasje e kryer në bashkëpunim”, parashikuar nga neni 76-25 i Kodit Penal, pasi dyshohet se shtetasi A.H., në vitin 2008 ka vrarë shtetasin F.K.(shtetas shqiptar), ngjarje e cila ka ndodhur në shtetin Grek.
Shtetasi i lartpërmendur iu dorëzua Drejtorisë Vendore të Policisë Fier për veprime të mëtejshme.