Të paktën 18 persona u vranë dhe dhjetëra të tjerë u plagosën gjatë një sulmi në një kolegj në Krime, rajon ukrainas i aneksuar nga Rusia.
Sulmuesi i Insitutit Kerç u identifikua si Vladislav Roslyakov dhe besohet se ka hapur zjarr brenda ndërtesës së kolegjit. Hetuesit rusë thanë se ai ishte një student 18-vjeçar dhe është përgjegjës për sulmin dhe dyshohet se ka vrarë veten.
Ai përshkruhej si një djalë problematik, i cili e quajti veten “Reich” dhe ishte i fiksuar pas vrasësve serialë, shkruajnë mediat ruse.
Duke folur për incidentin, presidenti rus, Vladimir Putin, tha:Është tashmë e qartë se ishte një krim, motivet e kësaj tragjedie po hetohen. Publiku i gjerë do të informohet për rezultatet e punës që po bëjnë autoritetet e zbatimit të ligjit dhe shërbimet speciale”.
Incidenti fillimisht u përshkrua si “akt terrorist”, por Komiteti Hetues i Rusisë e riklasifikoi atë si “vrasje masive”.
(M.Q/Faxweb)
