Vrau babë e bir në Elbasan, Gjykata jep vendimin për Etien Çanin

Është dhënë masa e sigurisë “arrest me burg” për Etien Çanit në Gjykatën e Elbasanit. Çani akuzohet se ka vrarë babë e bir në gusht të 2012 në qytetin e Elbasanit. Masa u zhvillua në kushte të rrepta sigurie.

Çani u ekstradua mëngjesin e sotëm nga Italia. Çani dhe Beqiri kanë qenë miq mes tyre, dhe kjo ka bërë që ai të hyjë me lehtësi në banesën e 40-vjeçarit dhe ta ekzekutojë atë, pa u pikasur as nga efektivët e policisë që e ruanin Beqirin, pasi ishte në masën e arrestit të shtëpisë.

Përveç Çanit për vrasjen e dy personave dyshohet dhe shtetasi Ervis Bardhi, 38 vjeç, nga Kavaja e banues në lagjen “Shënkoll” të Elbasanit.

Në 15 gusht të vitit 2012, 40-vjeçari Gentjan Beqiri është ekzekutuar me tre plumba teksa ishte duke fjetur në banesën e tij, në lagjen “Sporti i Vjetër” të Elbasanit. Dëshmitar i ngjarjes së rëndë ka qenë babai i tij, Nezir Beqiri, i cili ndërroi jetë pak minuta pas të birit.

Fillimisht u dyshua se Nezir Beqiri kishte pësuar infarkt pas ngjarjes, por ekspertiza mjeko-ligjore përcaktoi se i moshuari ka humbur jetën si pasojë e plagëve të shumta që ka marrë në trup. Ekzekutorët e kanë goditur disa herë në mushkëri, duke i shkaktuar hemorragji e pas disa minutash në urgjencën e qytetit, ai gjeti edhe vdekjen.

Dyshohet se vrasjet janë kryer për motive hakmarrjeje, pasi në 2005-n Gentjan Beqiri është akuzuar nga organet e drejtësisë për vrasjen e biznesmenit Sokol Çapja, vrasje e cila ka ndodhur në një prej bareve të Elbasanit, pranë Universitetit “Aleksandër Xhuvani”.

Prej disa kohësh, 40-vjeçari Gentjan Beqiri ishte në “Arrest shtëpie” për këtë vrasje. Ai vuante nga një dëmtim në shtyllën kurrizore, për shkak të një tentative arratisjeje nga qelitë e paraburgimit. Vrasjet janë kryer në gjakftohtësi dhe dy efektivët rojë nuk e kanë kuptuar që ekzekutorët kanë kryer krimin. Ata e kanë marrë njoftimin vetëm pasi ka ardhur ambulanca.

Për vrasjen e babë e bir, Policia e Elbasanit pati arrestuar në atë kohë Florenc Çapjan dhe A.J.. Por disa ditë më pas, Gjykata e Elbasanit ka liruar nga burgu njërin prej të akuzuarve për vrasjen e Nezir dhe Gentjan Beqirit.

Çapja u la i lirë për mungesë provash.

(K.H/Faxweb.al)