E fundit që është takuar me Fatbardha Torrën, përpara se ajo të përfshihej në një konflikt me bashkëshortin e saj, që do të përfundonte tragjikisht, ka qenë fqinja e 23-vjeçares.
Në dëshminë e saj zbardhur nga një gazetë e përditshme, fqinja e marrë në pyetje ka rrëfyer se me Fatbardhën shkonin shumë mirë. Atë ditë ishte takuar me të për t’i mbajtur të bijën 3-vjeçare ndërkohë që djali i vogël flinte dhe Fatbardha merrej me punët e shtëpisë.
Ajo shprehet se atë ditë, 23-vjeçarja ishte e qetë dhe nuk dyshoi për asgjë, nuk dëgjoi as zhurma, apo të bërtitura deri sa erdhi vëllai i bashkëshortit të saj, Erzenit që i tregoi se ç’kishte ndodhur.
Me Fatbardhën ishim fqinje. Kemi kaluar mirë së bashku dhe ajo ma ka besuar vajzën e vogël herë pas here kur i duhej të largohej nga shtëpia. Ishte pasdite kur ajo ma solli vajzën. Më kërkoi të kujdesesha pak për të, sepse duhet të bënte disa punë. Djalin e kishte në gjumë dhe kuptohet përfitonte nga ajo pak kohë që të bënte punët e shtëpisë dhe të merrej me lopën.
M’u duk e qetë dhe nuk dyshova për asgjë, pasi gjithmonë e ndihmoja kur mundesha. Nuk ishte hera e parë që vajzën ma linte mua. Shkonim shumë mirë. Nuk kam dëgjuar as zhurma, asgjë, deri kur erdhi vëllai i Erzenit i gjeti pa jetë dhe dha alarmin për çfarë kishte ndodhur.
Vajza luajti gjithë pasditen. Fatbardha po vonohej për të ardhur për ta marrë, por mendova se mos kishte shkuar nga tokat, që janë rreth dy orë larg. Nuk e mendova kurrë se mund të ndodhte diçka e tillë. Ata shkonin mirë me njëri-tjetrin, nuk di të kenë pasur konflikte”, është shprehur ajo. (XH.A/SHUPLAKA)
Discussion about this post