Vrasja e mjekut shkodran Ilir Aliaj me një plumb në kokë tronditi jo pak qytetin verior. Ndërkohë që autori i kësaj vrasje, i riu Dritan Ymeri dyshohet që të jetë larguar drejt Francës.
Kanë qenë grupet hetimore ata që kanë zbulusar këtë pistë për 26-vjeçarin. Mësohet paraprakisht se menjëherë pas vrasjes së kryer që ndodhi natën e 1 Korrikut në lagjen “Qemal Stafa” te vendi i quajtur “Ish-Dekori”, dyshohet që i riu Ymeri është larguar me një makinë tip “Golf 5” me targë AA 526 RA dhe me ngjyrë të zezë.
Sipas hetuesve të çështjes, i akuzuari për vrasjen e mjekut ka ikur fillimisht drejt Malit të Zi me destinacion final shtetin francez.
Sigurisht që në pikën kufitare të Muriqanit ai nuk ka kaluar nga pika e kontrollit por ilegalisht përmes malit në mënyrë që të humbiste të gjitha gjurmët.
26-vjeçari kishte 3 muaj që ishte kthyer nga Franca dhe për këtë shkak policia ka një dyshim se ka arritur që të gjejë mundësinë që të shkojë sërish në këtë vend. Nga ana tjetër ka dyshime se persona të ndryshëm e kanë ndihmuar ekzekutorin që të largohet pa lënë gjurmë dhe t’u shpëtojë forcave të policisë.
(E.K/SHUPLAKA)
