Vrau në mesnatë mjekun për pronat, si mundi 26-vjeçari t’i shpëtojë RENEA-s

Autori i dyshuar për vrasjen e shënuar pak para mesnate në lagjen “Xhabije” të Shkodrës, ende nuk është kapur nga policia.

I identifikuar si Dritan Ymeri 26 vjeç, ai akuzohet se ka qëlluar dy herë me armë zjarri në drejtim të shtetasit Ilir Alija 40 vjeç, i cili nuk ka mundur t’u rezistojë plagëve të marra dhe ka ndërruar jetë.

Policia shkoi në vendngjarje, por i riu që dyshohet se vrau komshiun për konflikt pronësie, arriti të largohet nga vendngjarja për t’u fshehur në banesë. Pavarësisht përpjekjeve për negociata dhe më pas ndërhyrjes së forcave speciale RENEA, autori i dyshuar nuk është gjetur në banesë.

“Në sallën operative të Drejtorisë Vendore të Policisë Shkodër ka ardhur një telefonatë për nje vrasje të ndodhur në lagjen “Qemal Stafa”, te “Ish Dekori”.
Me marrjen e njoftimit, shërbimet e Policisë kanë shkuar menjëherë në vendngjarje ku ka rezultuar se:
Pas një konflikti të çastit mes shtetasit I.A dhe D.Y, ky i fundit ka qëlluar me armë zjarri shtetasin I.A, ku si pasojë e të shtënave ka mbetur i vrarë shtetasi I. A., 40 vjeç, banues në lagjen Qemal Stafa.
Autori i dyshuar shtetasi D.Y, sipas informacioneve dyshohet se është fshehur në banesë, e cila është rrethuar nga Policia dhe pritet ndërhyrja e F.N.SH.
Grupi hetimor në vendngjarje po punon për grumbullimin e provave ligjore duke bërë të mundur sqarimin e rrethanave të ngjarjes si dhe dokumentimin ligjor të saj.”, citohet në njoftimin e policisë.

(XH.A/SHUPLAKA)