Familja e autorit Xhavit Saraçi, 56-vjeçarit i cili për një plep vrau 28-vjeçarin Ismet Xhanin, babin e një fëmije të mitur në fshatin Luz kanë frikën e hakmarrjes. 56-vjeçari Saraci e ka pranuar krimin e kryer. Të dy familjet, ajo e autorit dhe e viktimës, janë kushërinj me njëra-tjetrën, ndërsa janë përplasur disa herë në gjykatën e Kavajës.
Babi i 28-vjeçarit kërkon dënimin maksimal për autorin, duke treguar se si ju vra djali 28-vjeçar, i cili i ka lënë pas një fëmijë të vogël. “Duam që shteti t’i lidh një pension djalit”, thotë babai i viktimës për “News 24″.
Ndërkohë edhe Prokuroria e Kavajës ka kërkuar “Burgim të përjetshëm” për 56-vjeçarin. Në krahun tjetër janë dy motrat e autorit, ato të cilat deklarojnë se hetimet nuk janë kryer siç duhet. “Vrasja ka ardhur pasi viktima i cili është kushëriri jonë e ka qëlluar me një dru plepi në kokë vëllain” shprehen motrat. “Tani që vëllai im ra në burg, gruaja dhe fëmijët e tij janë larguar nga shtëpia nga frika e hakmarrjes”, deklaroi Ardiana Buzi.
NGJARJA
Në datën 4 janar thotë prokuroria, viktima dhe një kushëriri i tij po prisnin një plep në fshatin Luz i madh në Kavajë ku edhe banonin. Në atë moment pranë tyre është afruar autori Xhevat Saraçi, i cili fillimisht ka kërkuar mos ta prisnin pemën dhe më pas ka shtuar që dy bashkëfshatarët e tij mos t’i hidhnin degët në tokën e tij. Ndërsa i afërmi i viktimës Mario Xhani këmbëngul se plepi ka qenë molla e sherrit, vrasësi i cili është shfaqur i penduar ka rrëfyer në Gjykatë se ka humbur qetësinë pasi dy bashkëfshatarët e tij e kishin ofenduar. Prokuroria shpjegon në pretencë se gjatë kohës që viktima dhe Mario Xhani po kalonin me karrocën e ngarkuar me dru në rrugën kryesore të lagjes, autori ka qëlluar me armë zjarri në drejtim të tyre. (J.V/Shuplaka)
