Sekretari i një këshilli bashkiak në një shtet meksikan qendror, Guanajuato, i cili është përfshirë nga vala e vazhdueshme e dhunës në vend, u vra ndërsa po shihte një ndeshje basketbolli amatore në një hapësirë publike, thanë autoritetet lokale.
Ignacio Alejandro Roaro ishte sekretari i këshillit bashkiak në Apaseo el Grande.
Këshilli i qytetit “dënon me forcë sulmin e pabesë, të pazakontë dhe frikacak që u krye të shtunën (pardje), gjatë të cilit kolegu dhe miku ynë, sekretari i këshillit të qytetit, Ignacio Alejandro Roaro, humbi jetën”, tha ai në një deklaratë.
Më 23 qershor, në të njëjtin shtet, në Irapuato, rreth 80 kilometra në perëndim të Apaseo el Grande, njëmbëdhjetë persona u qëlluan për vdekje dhe rreth 20 të tjerë u plagosën në një sulm që synonte një grup njerëzish.
Dhe më 27 maj, 17 trupa u gjetën nga policia në një shtëpi të braktisur, gjithashtu në Irapuato.
Në vitin 2024, Guanajuato ishte, edhe një herë, shteti meksikan me më shumë vrasje (3,151) se çdo shtet tjetër – ose 10.5% të rasteve të kësaj natyre në të gjithë vendin, sipas shifrave zyrtare.
Me një sipërfaqe të barabartë me atë të Belgjikës, shteti i Guanajuato karakterizohet si një qendër e rëndësishme industriale, pasi pret fabrikat e prodhuesve kryesorë të automobilave (Mazda, Toyota), një magnet për turistët, pasi ka destinacione të njohura, si dhe një qendër aktiviteti kulturor, me festivalin e tij të teatrit çdo tetor.
Megjithatë, në të njëjtën kohë, është një fushë konflikti midis dy bandave, të cilat pretendojnë në veçanti kontrollin e kontrabandës së karburantit. Nga njëra anë, është Gjenerata e Re e Kartelit të Jalisco (NGJ), e cila u shtua së fundmi nga administrata Donald Trump në listën e zezë të organizatave të huaja “terroriste” të hartuara nga Shtetet e Bashkuara, dhe nga ana tjetër, një bandë lokale, Karteli Santa Rosa de Lima (SRL).
