Vuçiç: Kosova është çështje kryesore në negociatat me BE-në, nuk guxojmë ta harrojmë

Presidenti i Serbisë, Aleksandër Vuçiç, tek sa ka folur sot në Beograd për negociatat e Serbisë me BE-në, ka përmendur edhe kapitullin e 35-të i cili ka të bëjë me Kosovën, ai deklaroi se ky kapitull nuk guxon të harrohet dhe se për këtë duhet dialogu i brendshëm në lidhje me Kosovën.

Pas takimit me raportuesin e Parlamentit Evropian për Serbinë, David McAllister, Vuçiq tha se çështje kyçe është Kosova, e pastaj raportet e Serbisë me Rusinë, politika e jashtme, sundimi i i ligjit dhe se Serbia duhet të ballafaqohet me të gjitha këto çështje.

“Serbia është në rrugën evropiane, sepse dëshirojmë t’i takojmë kësaj shoqërie”, tha Vuçiq dhe ka shtuar se “e dimë se kemi vështirësi, të cilat vendet e tjera nuk i kanë pasur, askujt nuk i bëhen pyetje të tilla sikur neve për Kosovën dhe këtë e kemi ditur, kjo nuk është risi”.

Mëtutje, Vuçiq tha se “këtë nuk guxojmë ta harrojmë”, raporton agjencia Beta nga Beogradi.

(B.H/Shuplaka)