Policia zvicerane ka shtuar masat e sigurisë për oficerin Emiljano Nuhu i cili denoncoi dhunën ndaj Xhisiela Malokut nga djali i deputetit të PS-së Rrahman Rraja, Rexhep Rraja. Shtimi i masave të sigurisë për oficerin Nuhu ka ndodhur pasi Durim Bami, ka udhëtuar jashtë Shqipërisë pak ditë më parë.
Burime për ‘Fax News’ nga sistemi TIMS bëjnë me dije se Durim Bami ka dalë jashtë Shqipërisë më 6 tetor, shkruan ‘Faxweb.al’
Bami ka kaluar pikën e Morinës dhe më pas është larguar me avion nga Kosova, dyshohet drejt Zvicrës.
Policia zvicerane ka marrë masat duke transferuar Emiljano Nuhun në strehim të sigurtë. Më parë Emiljano Nuhu jetonte prane kampit të azilantëve.
Por çfarë kishte deklaruar oficeri Nuhu në lidhje me Durim Bamin, që bëri policinë zvicerane t’i ndryshonte vendodhjen Emiljano Nuhut?
Në letrën e dorëheqjes së tij, por edhe në dëshminë që ka dhënë me zë dhe figurë, nënkomisari i policisë, Emiljano Nuhu tregon ndër të tjera se u largua nga Shqipëria pasi deputeti Rrahman Rraja kishte porositur vrasjen e tij tek Durim Bami, një personazh i njohur i botës së krimit.
“Më datë 12.09.2018, kam marrë informacion nga rrjeti im sekret që deputeti Z.Rrahman Rraja, ka kontaktuar me shtetasin Durim Bami dhe i ka kërkuar që të më ekzekutojë, pasi unë po i hapja shumë probleme dhe po e dëmtoja politikisht deputetin. Ai është shprehur që me kaq probleme që më ka hapur oficeri Emiljani Nuhu, unë nuk shkoj dot në Parlament. Shtetasi Durim Bami e ka marrë përsipër ekzekutimin tim. I gjetur në kushte të tilla, i lënë në dorën e fatit nga shteti u largova menjëherë dhe për sigurinë time dhe të familjes kërkoj të lirohem nga Policia e Shtetit”, shkruante Nuhu në letrën e tij të dorëheqjës.
Kujtojmë që Durim Bami pas një aksioni të papritur në Nikël. Pak orë pas ndalimit, Bami u lirua pa asnjë akuzë, dhe duket se kjo e ka bërë të niset drejt udhëtimit për në Zvicër.
(B.H/Faxweb)
