Ditën e sotme, OSBE ka prezantuar monitorimin e Gjykimeve Administrative për vitin 2015. Në fjalën e tij, zv/kryetari i Prezencës së OSBE-së në Tiranë, Robery Wilton ka vlerësuar shqyrtimin e çështjeve në shkallën e parë dhe ka theksuar nevojën për të punuar më shumë pasi Shqipëria nuk e ka luksin të vijojë të vonojë drejtësinë.
“Shqyrtimi i çështjeve në shkallën e parë, relativisht i shpejtë. Monitorimi i Gjykimeve Administrative për 2015-ën u bë falë bashkëpunimit me institucionet e pavarura. Shqipëria nuk e ka luksin që të vazhdojë të vonojë drejtësinë. Gjykatave iu duhen akorduar burimet e nevojshme që të përmbushin detyrat në mënyrë efikase, që rikthen besimin dhe pritshmërinë e qytetarëve tek institucionet ”, u shpreh ndër të tjera Wilton.
Një ditë më parë, gjatë një takimi në kuadër të mbështetjes ndaj dënuarve, Wilton u shpreh se qeveria duhet të bëjë më shumë për personat që dalin nga qelitë me qëllim që ata të integrohen në shoqëri.
“Nëse një ish-i dënuar nuk arrin të gjejë punësim që shpërblehet, ai apo ajo ka më shumë prirje t’u kthehet veprimeve kriminale në mënyrë që të mbijetojë. Pra, aftësia për të gjetur punësim është element kyç për rehabilitimin dhe riintegrimin, qëndrueshmërinë financiare, vetëbesimin dhe, në fund, për heqjen dorë nga krimi.”, u shpreh ai.
