Xhaçka takim me ministrin grek për dosjen “Beleri”: Nuk është çështje politike, blerja e votës është shkelje e rëndë e ligjit

Olta Xhaçka është takuar në Bruksel me Ministrin e Jashtëm grek, Nikos Dendias.

Në takim është diksutuar mbi arrestimin e Fredi Belerit dhe Pandeli Kakoveshit me akuzën për blerje votash.

Mbi takimin, Ministrja e Jashtme shqiptare, Olta Xhaçka ka shkruar në Twitter, se takimi ka shërbyer për të diskutuar çështjen Beleri me Dendias.

Olta Xhaçka: Bruksel, takimi me mikun dhe kolegun tim, Ministrin e Punëve të Jashtme të Greqisë, Nikos Dendias ishte një mundësi shumë e mirë për të diskutuar mbi çështjen “Beleri”.

Theksova qartazi se kjo është një çështje gjyqësore që nuk duhet të ndikojë në faqen e re që kemi hapur në marrëdhëniet tona dypalëshe.

Xhaçka ka theksuar që kjo është një çështje jo politike dhe se e vetmja gjë që mund të bëhet është të pritet që procesi të ndjekë rrjedhën e tij.

Kjo nuk është as çështje e të Drejtave të Njeriut, as politike, e jo më një çështje dypalëshe. Z. Beleri gëzon të njëjtat të drejta si çdo qytetar tjetër shqiptar dhe asnjë qytetar shqiptar nuk është mbi ligjin.

Blerja e votës është një shkelje e rëndë e ligjit tonë dhe çështja e tij tashmë është në gjykatë.

E vetmja gjë që ne të gjithë mund të bëjmë është të presim me durim që procesi të ecë në rrjedhën e tij dhe të mos paragjykojmë apo hamendësojmë atë.