Ministri në largim, Fatmir Xhafaj, ka zhvilluar mbrëmjen e sotme një takim me baskëpunëtorët e tij në Ministrinë e Brendshme, ku teksa foli për punën e bërë gjatë drejtimit të institucionit nga ai, u ndal edhe tek audiopërgjimi i vëllait të tij, i cili u publikua nga opozita.
Sipas tij, opozita i ka bërë atij shantazh ndonëse ai ishte tërësisht i manipuluar.
“Objektiva dhe rezultate të përmbushura, për hir të së vërtetës me shumë sakrifica, për mua dhe familjen time, që në mënyrë të pamerituar është përballur dhe përbaltur nga sulme të egra të orkestruara nga opozita gjatë gjithë kësaj periudhe. Ndjehem mirë që në përballimin e kësaj situate specifike kam pasur mbështetjen e Kryeministrit, të kolegëve të grupit parlamentar dhe padyshim të bashkëpunëtorëve të mi të afërt.
Ndjej keqardhje, për atë pjesë të politikës Shqiptare, e cila në debatin për mua si person, apo në diskutimet mbi Policinë e Shtetit, është sjellë, pak të thuash diletante dhe e papërgjeshme. Në jo pak raste edhe jo humane. Në një kohë që do të duhej që politika të sillej ndryshe, që edhe atëherë kur ka vend për të thënë diçka, ka disa mënyra për ta thënë atë pa dëmtuar interesat e qytetarëve.
Por, natyra dhe edukimi im familjar, eksperienca ime politike dhe ajo jetësore më ka bërë që deri në fund të qëndroj në respekt të ligjit dhe të jem sa më institucional dhe i përgjegjshëm në gjithë konfliktin politik, që opozita krijoi me mua dhe për mua. Duke përfshirë këtu edhe manipulimin komplet kriminal të bërë në çështjen e audio- përgjimit me një qëllim final: shantazhin ndaj meje në funksionin e ministrit. E për fat të keq në këtë orkestrim duket se janë përfshirë edhe segmente të disa agjencive ligj zbatuese vendase. Dua të nënvizoj edhe faktin se ky sulm jo vetëm ka në themel diletantizmin politik të opozitës, por ai edhe për këtë shkak, ka pas tij interesat e botës së krimit.”, – tha Xhafaj.
Më tej ai u shpreh: “Përballë këtij realiteti jam përpjekur të sillem si shtetar serioz edhe pse përpara kisha llumin e politikës.”
Duke u ndalur tek dorëheqja, ai u shpreh se, “nuk ka rëndësi se sa rri në një karrige pushteti, por çfarë bën”. Ai shtoi se ndonëse ka një pjesë e shohin pushtetin si forcë, ai këtë gjë nuk e kishte bërë asnjëherë.
(B.B/ Faxweb.al)
