Dorëheqja e beftë e Fatmir Xhafajt nga posti i ministrit të brendshëm ka sjellë reagimet e para në kampet politike. Kreu i PD-së Lulzim Basha e konsideroi vetëm fillimin dorëheqjen e Xhafajt, dhe në të njëjtën linjë është dhe deputeti i tij Klevis Balliu.
Në një reagim në rrjetet sociale, Balliu shkruan se e gjithë kupola e PS është në krye të krimit dhe udhëhiqet nga bandat. Ndërkohë që deputeti demokrat bën edhe pyetjen që mundon shumëkënd sot, lidhur me anullimin e një konference të paralajmëruar nga Tahiri.
“Xhafa u largua që të heshtë Saimiri?! Kujt i shërbeu Fatmir Xhafaj me largimin, Edi Ramës, Olsi Ramës apo u dorëzua përballë Tahirit?”, shkruan mes të tjerave Balliu.
Reagimi i plotë:
Dorëheqja e Fatmir Xhafës shënon fillimin e fundit të rilindjes
Ikën Ministri i dytë i Brendshëm i Rilindjes pas denoncimeve të PD.
Fatmir Xhafaj, vëllai i trafikantit të drogës dorëzohet dhe largohet nga detyra e ministrit. E gjithë kupola e PS është në krye të krimit dhe udhëhiqet nga bandat.
Sot është një tjetër betejë e fituar nga demokratët, LUFTA do edhe më shumë punë, por ne nuk do të ndalemi.
Rastësi apo çfarë ishte ky largim pikërisht në ditën kur Saimir Tahiri kishte lajmëruar të fliste për kundërshtarët e tij të Rilindjes, por tashmë është tërhequr nga ky komunikim publik.
Bandat e larguara po kërcënojnë bandat në qeveri.
Xhafa u largua që të heshtë Saimiri?!
Kujt i shërbeu Fatmir Xhafaj me largimin, Edi Ramës, Olsi Ramës apo u dorëzua përballë Tahirit?
Sot detyra jonë është të SHPORRIM bandat e RILINDJES.
(E.K/FAXWEB.AL)
Discussion about this post