Pas pak ditësh do të bëhen zyrtare emrat që Panuçi do të grumbullojë për dy ndeshjet eleminatore që Kombëtarja Shqiptare do të ketë në kuadër të Botërorit në Rusi. Ndërkohë që siç pritej ashtu si De Biazi edhe Panuçi mund të lërë jashtë skuadre Taulant Xhakën.
Pavarësisht formës së tij të mirë që tregon herë pas here Xhaka është një nga futbollistët më problematikë sa i përket disiplinës.
Udhëtimi i Panuçit në Zvicër për të takuar nga afër mesfushorin e Bazelit duket që ka vendosur fatin e Taulant Xhakës. Arsyeja disiplinore ka bërë që trajneri i ri të mos e përfshijë futbollistin në listën që do të publikohet më 28 gusht.
Si duke përsëritur vendimin e De Biazit, edhe pse me arsyet e tij, trajneri i ri po vijon vendimet e De Biazit në përfaqësuesen kuqezi. Jo për arsye disiplinore, por për mungesë të minutazhit me PAOK-un, pritet që edhe Ergys Kaçe të mos jetë në listë.
Po ashtu një tjetër mungesë për Kombëtaren Kuqezi do të jetë ajo e sulmuesit shkodran Bekim Balaj. Bomberi shkodran ka kaluar një dëmtim të rëndë në gju, për të cilin i është dashur trajtim në Spanjë. Gjë që ka bërë të mungojë edhe së fundmi me skuadrën ruse.
(E.K/SHUPLAKA)
Discussion about this post