Kandidati i PD-së në Qarkun e Dibrës, Xhemal Gjunkshi, denoncon Bashkinë e Dibrës në SPAK, se kanë shkelur ligjin zgjedhor, duke ndërtuar rrugë në fshatin Otesh. Ka qënë vetë Gjunkshi i cili ka kapur në flagrancë punonjësit e Bashkisë, të cilët kanë deklaruar se kanë qenë të urdhëruar nga Drejtori i Shërbimeve të Bashkisë, Bedri Kamberi.
Kandidati në listën e hapur të PD-së në Dibër, ka komunikuar me banorët e zonës, të cilët i kanë treguar se prej 12 vitesh socialistët nuk janë kujtuar për këtë rrugë, dhe vetëm pak ditë përpara zgjedhjeve, kanë fillur të hapin rrugën, për ta shtruar me çakull.
Më tej, Gjunkshi ka njoftuar Policinë e Peshkopisë për këtë kundërvajtje penale, pasi sipas tij për ndërtim e kësaj rruge nuk ka pasur asnjë tabele, apo njoftim të mëhershëm.
Ai ka pritur për rreth 45 minuta Policinë e Shtetit, e cila nuk shkoi në vendngjarje. Dhe vetëm pas telefonatës së dytë, Policia erdhi, duke mos kryer asnjë veprim.
Pas kësaj Xhemal Gjunkshi i është drejtuar strukturave të SPAK të vendosur në Dibër, ku ka bërë edhe kallzim penal në Komisariatin e Policisë së Peshkopisë për ngjarjen në fjalë.
