E gjithë bota është tronditur nga fotot, videot, raportimet e atyre që vetëquhen gazetarë, pamjet me dron në Aleppo servirur nga mediat ndërkombëtare. Histori e një lufte që thuhet se po kryhet pa mëshirë.
Por një fat të njëjtë ka edhe Xheni, motra e së cilës ka humbur jetën jo nga lufta, por nga një tjetër vrastar: varfëria.
”Lëvizja egjiptiane dhe rome” e tregon kështu historinë e saj:
”Kjo është Xheni, 12 vjeçe. Ajo nuk ka pasur kurrë çelësa shtëpie që kur ka lindur. Prej 18 vitesh familja e saj quan shtëpi kartonat që sajon rrugëve të Tiranës, (si ato kështjellat që ne luanim kur ishim të vegjël, por çdo ditë të vitit dhe në të ftohtë e shi).
Thotë se motrën nuk e ka më, sepse i vdiq nga një dhimbje dhëmballe që iu kthye në infeksion të rëndë, të cilin nuk e operonin dot ngaqë nuk kishin para.
Endrra e saj këtë Krishtlindje dhe Vit të Ri, për të 12 vit radhazi është të zgjohet në krevatin e saj, në një shtëpi të vogël e të ngrohtë, me mamin dhe babin që nuk kanë më shumë se 39 mijë lekë të vjetra për t’u ushqyer dhe jetuar. Xheni ëndërron gjithashtu të mund të kthehet në shkollë, pasi do të jetë si të gjithë fëmijët e tjerë. Krishtlindjet dhe Viti i Ri po afrojnë, a mund t’ia bëjmë endrrën realitet Xhenit?”
Dhe kushdo që po shpreh dëshirën të ndihmojë familjet në Aleppo, nëse s’e gjen mënyrën, a mund t’i dhurojë sadopak Xhenit?!
