Ish-ministri Ylli Manjani zbulon prapaskenën e shkarkimit të tij nga detyra. Në një intervistë për dritare.net, Manjani tregon se lajmin për shkarkimin ia ka komunikuar i pari kreu i LSI-së, Ilir Meta.
Ndërkohë, duke folur për misionin e tij si ministër, Manjani tregon se mbi të gjitha një ministër nuk mund të nënshtyrohet kollaj.
“Misioni im, si ministër, ishte vetëm një, të vendos standardin e sjelljes publike të ministrit. Këtë mandat më dhanë dhe ndoqa strategjinë të kryej mandatin dhe përgjegjësinë që më vendosën, standardin e një ministri. Ministri është autoritet publik dhe që nuk nënshtrohet kollaj, pa argument. Ministri propozon, debaton.”, tregon Manjani.
Më tutje, ish-ministri tregon se pse e ka refuzuar dorëheqjen, por e ka vështirësuar akoma më shumë largimin nga detyra.
“Meta më bëri të ditur situatën e vështirë që kishte krijuar standardi im si ministër në raport me kryeministrin dhe më tha se mund të zëvendësohesha dhe unë rashë dakord. LSI gjykon më mirë se unë.
Metës do ia jepja në çdo çast dorëheqjen, por jo Ramës. Unë nuk kisha kryer asnjë krim. Ndaj refuzova dorëheqjen dhe dola fola. Duhej të flisja, sepse nuk u hoq drejtori i burgut te Vaqarrit, por Ministri i dytë i Drejtësisë, pas Naços.”, vazhdon Manjani.
Ylli Manjani u shkarkua zyrtarisht nga detyra më 30 janar, kjo për shkak të deklaratave të tij të njëpasnjëshme, kundër kryeministrit Rama dhe ministrit të Punëve të Brendshme, Saimir Tahiri. Megjithatë, në urdhrin e shkarkimit të Ramës, shkruhej se arsyeja kishte të bënte me përforcimin e marrëdhënieve të qeverisë me parlamentin.
Ndërkohë sot, ish-ministri lajmëroi përmes Facebook-ut se është bërë pjesë e Këshillit të Përgjithshëm të Avokatisë. (D.D/Shuplaka)
Discussion about this post