40 vjet më parë, Yllka Mujo dhe Rajmonda Bulku nga qyteti i Pogradecit do të interpretonin së bashku një nga filmat më të dashur siç ishte ‘’Zonja nga Qyteti” dhe më pas “Zonja nga fshati.
Film që vijon të mbetet edhe sot një nga më të dashurit e kinematografisë shqiptare.
Ndërsa sot nga Korça ato do të jenë sërish bashkë në një projekt artistik, që është vërtet për të mos u humbur.
Do të jenë pjesë e komedisë “8 Femrat” të regjisores Driada Dervishi që do të hapë Festivalin mbarëshqiptar të Komedisë në Korçë. Mujo dhe Bulku kanë luajtur së bashku në teatër edhe në veprën “Zbutja e kryeneçes”.
“Për herë të parë në skenën e re të Teatrit Korçë do të bëhen bashkë disa nga aktoret më të mira të skenës shqiptare : Yllka Mujo, Olta Daku, Zamira Kita, Rajmonda Bulku, Merita Çoçoli si dhe brezi i ri i aktoreve që do ta vazhdojnë traditen e teatrit të mirë Klodjana Keco, Blerta Belliu, Ilda Pepi e Paola Kodra. Nën regjinë e Driada Dervishit komedia 8 FEMRAT do të hapë sezonin e ri teatror si dhe Festivalin mbarëshqiptar të Komedisë KokoFest 2017!”, shkruan Teatri i Korçës.
Shfaqja “8 Femrat” do të vijë më pas edhe në Teatrin Kombëtar dhe në Teatrin e Durrësit, ku Driada Dervishi është regjisore.
