Kryeministri i Maqedonisë, Zoran Zaev do të vizitojë ditën e sotme Kosovën. Ashtu siç raportojnë edhe mediat kosovare, gjatë vizitës në Prishtinë, Zaev do të mbajë një sërë takimesh me udhëheqësit e institucioneve të Kosovës, duke nisur nga kryeministri Ramush Haradinaj, kryetari i Kuvendit Kadri Veseli si dhe me presidentin Hashim Thaçi. Theksojmë se kjo është vizita e parë zyrtare e një kryeministri të Maqedonisë në Kosovë.
Duhet të thekosojmë që në Maqedoni Nikolla Gruevski ka dhënë dorëheqje nga drejtimi i partisë VMRO -DPMNE. Kjo parti e ka qeverisur Maqedoninë deri para qershorit të këtij viti kur drejtimin e vendit e mori Lidhja Social Demokrate e kryeministrit aktual, Zoran Zaev. Nga ky post Gruevski dha dorëheqjen e parevokueshme, Komitetit Drejtues të partisë për shkak të rezultatet të dobëta në zgjedhjet lokale të muajit të tetor.
Nga 80 komuna, kjo parti arriti të fitojë vetëm në pesë prej tyre duke shënuar rezultatin më të dobët që nga vendosja e pluralizmit.
Kryetar i ri partisë më të madhe të opozitës do të zgjidhjet në kongresin e jashtëzakonshme pas dy javësh, ku do të votojnë të gjithë anëtarët.
Deri më tani për kreun e ri të partisë përmenden disa kandidatura të mundshme, si deputetët Ilija Dimovski dhe Antonio Mislloshoski, ish Ministri i Punëve të Jashtme, Nikolla Poposki, ish Ministri i Shëndetësisë, Nikolla Dimitrov, Hristijan Mickovski, por edhe emri i ish Kryetarit të partisë, Lubço Georgievski. Largimi i Gruevskit nga partia ndodhi në momentin kur ai dhe shumë personalitete tjera të saj po përballen me procese gjyqësore për vepra të rënda penale. (J.V/Faxweb)
Discussion about this post