Pas përfundimit të takimit me aleatët ku u diskutua mbi reformën zgjedhore, është mbledhur grupi parlamentar i Partisë Demokratike.
Në këtë mbledhje, deputetët e opozitës kanë shprehur qëndrime të ndryshme lidhur me qëndrimin që PD duhet të mbajë në vijim. Bëhet e ditur se në mbledhjen e grupit parlamentar të PD-së, ku Basha informoi deputetët mbi takimin me aleatët, u diskutua edhe mundësia e bojkotit.
Nisur nga firmosja e memorandumit me partitë në opozitë, Aldo Bumçi është shprehur se nëse merret vendimi për nisjen e aksionit, duhet që ai të çohet deri në fund. Nga ana tjetër, Genc Ruli ka shprehur mendimin për shtyrjen e datës së zgjedhjeve me qëllim që ato të jenë normale (të përfshijnë votimin dhe numërimin elektronik): “Për të arritur zgjedhje normale, ia vlen të shtyhet data.”
Qëndrim të njëjtë ka mbajtur edhe Edmond Spaho: “Të dalim nga parlamenti për presion, kemi memorandumin me 22 parti”.
Nga ana tjetër, deputetja demokrate Majlinda Bregu është shprehur dyshuese. “A jemi të sigurt se jemi në gjende për protesta? Nuk jam për të bojkotuar parlamentin. Jo 22 po 52 të jenë aleatët tanë, barra është e jona. S’mund të dalim nga parlamenti e të presim ndonjë deklaratë nga Hahn.”, mësohet të ketë thënë ajo. Kundër bojkotit është shprehur edhe Jozefina Topalli.
Ish-kryeministri Berisha ka apeluar për përdorimin e gjithë potencialit për zgjedhje të lira: “Sot i gjithë territori me banda të ministrave e deputetëve. Opozita të përdorë tërë potencialin për zgjedhje të lira. “
Në përfundim të mbledhjes, grupi parlamentar i PD-së ka vendosur për intensifikimin e luftës parlamentare për zgjedhje të lira. (XH.A/SHUPLAKA)
