Zbardhen përgjimet për pedagogët në Shkodër, Babai-Vajzës: Shko jepi veglën

Zbardhen përgjimet telefonike për çështjen e arrestimit të dy pedagogëve në Universitetin e Shkodrës.

”Shko jepi veglën”, shkruhet në transkriptet e bisedave të zbardhura.

Brunilda Alushi studentja e vitit të tretë të Fakultetit të SHkencave Shoqërore, ka komunikuar me sekserët për të marrë provimin për 140 mijë lekë të vjetra. Por në një rast asaj nuk i ka dalë gjumi në mëngjes, duke u justifikuar te sekserët.

Babai i saj, Vehbi Alushi siç raporton ”Shqiptarja.com”, e ka sugjeruar në telefon atë të shkojë te Ndoc Deda, sekseri dhe t’i japë ”veglën”, pasi kishte përfunduar provimin.

Në fakt, studentja ka hyrë në provimin e lëndës ”Histori e Organizatave Ndërkombëtare” dhe edhe pse nuk ka shkruar asgjë duke e lënë fletën krejtësisht të bardhë ka marrë notë kaluese.

Prokurorët kanë dalë në rezultatin se Alushi, së bashku me të atin i kanë dorëzuar paratë Dedës që studentja të merrte provimet dhe diplomën.

Për skemën e korrupsionit në Shkodër u arrestuan pedagogët Simon Lufi, shef i Departamentit të Historisë dhe Roakin Dabërdaku zëvendësdekan i Filologjikut, të cilët kanë marrë masën e sigurisë ”arrest shtëpie”.