Është zbardhur dëshmia e dëshmitarit kyç në hetimin e nisur ndaj Emiljano Shullazit dhe katër personave të tjerë që dyshohen për “gjobëvënie” dhe “përvetësim të pronave përmes kërcënimit”.
Në rrëfimin e tij për një gazetë të përditshme, biznesmeni Ylvi Beqaj ka rrëfyer njohjen me Shullazin, si fillimisht i kishte kërkuar ndihmë për përvetësimin e ish-hotel Vollgës dhe marrëveshjen për ta shpërblyer me 20% të pronës. Por ai shprehet se në vijim marrëdhënia u shoqërua me tensione dhe Emiljano Shullazi e kërcënoi disa herë si dhe i vendosi gjoba.
Beqja pretendon se nën kushtet e kërcënimeve, i ka dhënë Emiljano Shullazit një pjesë të pasurisë së të ish-hotelit dhe një total prej 541 mijë euro.
Ai tregon se kërcënimin e parë nga Emiljano Shullazi e ka marrë pas një takimi ku ky i fundit kishte shfaqur pakënaqësi me kontratën e firmosur për Vollgën.
“Mbeta i befasuar dhe unë i thashë që ne e kemi një kontratë dhe kur të mbarosh punën tënde, kur të mbaroj gjyqet, mund të mbarojmë punë bashkë. Në këtë moment më shau dhe fyeu me fjalë nga më të rëndat. Nxori diçka nga brezi dhe në sekondë pashë që në bark më kishte vënë një pistoletë. “Dëgjo këtu ti k…, unë i nxjerr zorrët në shesh më të mirit dhe jo ty që s’ma ndjen fare!”. U tremba dhe më iku gjaku.”, është shprehur biznesmeni Ylvi Beqja.
Gjatë kësaj të premte, Gjykata e Krimeve të Rënda pritet që të zhvillojë seancë për sigurim prove të dëshmisë së dëshmitarit të mbrojtur Ylvi Beqja. Pritet një përballje e e Beqjas me Shullazin dhe të tjerë të arrestuar që përmenden në dëshminë e dhënë nga biznesmeni. (XH.A/SHUPLAKA)
Discussion about this post