Në seancën e sotme, Gjykata e Krimeve të rënda ka vendosur që Ferdinand Rukaj, 52-vjeçari që të shtunën hodhi gruan nga kati i katërt, të qëndrojë në qeli.
Në këtë seancë gjyqësore Rukaj nuk ka pranuar të flasë, megjithatë televizioni “Klan” ka zbardhur një pjesë të dëshmisë së tij përpara hetuesve në Fier.
“Shkova në shtëpi dhe Liljana nuk më pranoi. Nisëm grindeshim, i futa duart në fyt dhe e shtrëngova fort. I thashë: Mbylle gojën se kjo gojë e shkatërroi shtëpinë dhe familjen. Më goditi në fytyrë dhe më tha: Kriminel, gjakpirës.”, shprehet Rukaj.
Teksa tregonte momentin e vrasjes, 52-vjeçari është shprehur se ndihet i penduar për krimin e kryer, sidomos për faktin se tashmë dy fëmijët e tyre do të mbeteshin jetimë.
“I vendosa duart e Liljanës poshtë sqetullave dhe e tërhoqa drejt tualetit. E ngrita me shpinë dhe e vendosa te parmaku i dritares. Liljana reagonte duke tentuar që të mbahej në anët e dritares, por unë shtyva atë duke e hedhur përjashta. Jam i penduar, pasi tani kam dy fëmijë jetimë.”, është shprehur i akuzuari.
Më pas Ruko, ka pohuar se pasi kishte kryer krimin kishte njoftuar policinë, si dhe kishte telefonuar të vëllain duke i thënë se çfarë kishte bërë.
