ZBARDHET dëshmia e efektivit të plagosur te ish-Parku: Gjithçka ndodhi në pak minuta

Ka dhënë dëshminë e tij në Polici, Ermal Bregu, efektivi i Policisë i cili u plagos dje në zonën e ish-Parkut të Autobusëve.

Bregu e ka kaluar gjendjen e rrezikut për jetën, teksa është shprehur se konflikti ka ndodhur për motive banale. 

“Dy personat i njoh sepse jetojnë në lagje. Nuk kam pasur konflikte të mëparshme me ta. Gjithçka ndodhi në pak minuta për arsye banale.

U gjendëm përballë dhe po më thoshin pse na shikon. Më fyen dhe pastaj u grindëm me fjalë. Pastaj njëri prej tyre nxori pistoletën dhe më gjuajti”, mësohet të ketë thënë ai.

INFORMACIONI I POLICISË PËR NGJARJEN DJE: 

Më datë 28.11.2017, rreth orës 19.35, në Sallën Operative ka ardhur një telefonatë se në rrugën “Kongresi i Lushnjes”, ka patur të shtëna me armë zjarri.

Menjeherë në vendgjarje kanë mbërritur shërbimet e Policisë dhe Ambulanca ku nga veprimet paraprake ka rezultuar se:

Në rrugën “Kongresi i Lushnjës”, tek ish parku i autobuzave përballë një lokali,  shtetasi E.B, rreth 33 vjeç,  punonjës policie i Komisariatit te Policise Nr 1 Tirane,  por jashtë orarit të sherbimit ka debatuar me dy shtetas banore të lagjes.

Në konflik e sipër njëri prej tyre ka qëlluar me armë zjarri ku për pasojë ka mbetur i plagosur shtetasi E.B.

Shtetasi E.B., është derguar në spital dhe ndodhet  nën kujdesin e mjekëve.

Grupi hetimor po  punon për sqarimin e plotë te rrethanave të ngjarjes dhe identifikimin e kapjen e autorëve.

(E.K/Faxweb)