Ish-punonjësi i kompanisë siguruese “Ro-Gat Security”, Fation Xhyliu, ka shërbyer si çelësi për zbardhjen e identitetit të pesë anëtarëve të tjerë të bandës dhe skemës së grabitjes së shumës 3.2 milionë dollarë nga furgonët e kompanisë “Jaguar Security”.
Referuar dëshmisë së tij të zbardhur nga “Shqiptarja.com” mësohet se Xhyliu ka pasur rolinn e vëzhguesit të automjeteve që transportonin paratë. Ai ka qenë në Vorë, ku ka sinjalizuar anëtarët e tjerë të bandës për mjetet transportuese të parave në momentin që po i afroheshin zonës së Laknasit.
Në dëshminë e tij përpara prokurorëve, Fation Xhyliu ka treguar se prej disa kohësh kishte qenë punonjës në kompaninë siguruese. Një ditë përpara se të kryhej grabitja, ai ka kërkuar leje në punë me justifikimin se kishte një punë personale.
I ndaluari ka treguar se gjatë kohës që ishte punonjës i kësaj kompanie, ka pasur dijeni për transportimin e parave dhe vlerës së tyre, ndaj kishte vënë në dijeni edhe anëtarët e tjerë të bandës me të cilët do të bashkëpunonte.
Ish-polici ka rrëfyer më tej se kur ishtë paraqitur në punë, kishte dëgjuar kolegët e tij të eskortës së shoqërimit të parave se si ishin sulmuar në mënyrë të befasishme dhe s’kishin mundur të bënin asnjë lëvizje. Pas grabitjes, mësohet se ai kishte dhënë dorëheqjen me pretendimin se kishte gjetur një punë më të mirë ndërsa disa kolegëve u ishte shprehur se do të largohej jashtë shtetit. (XH.A/SHUPLAKA)
