Ervis Martinaj, njëri prej të plagosurve të konfliktit me armë në zonën e ish-Bllokut ditën e enjte, ka dhënë dëshminë për hetuesit në lidhje me ngjarjen. Edhe pse i plagosur në qafë me armë zjarri, Martinaj ka folur më shumë se një orë për hetuesit, duke dhënë versionin e tij për ngjarjen.
Ai ka mohuar që të ketë qenë shënjestër e ndonjë atentati ndaj tij, duke thënë se nuk ka pasur lidhje apo rol në konfliktin e ndodhur. Sipas burimeve, Martinaj ka thënë se gjithçka ka ndodhur mes viktimës, Fabian Gaxhës dhe komandos Meviol Bilo dhe se ai është plagosur aksidentalisht nga konflikti i armatosur mes këtyre të dyve.
Po kështu, Martinaj ka folur edhe për marrëdhëniet me Ervin Matën, të fejuarin e Elvana Gjatës, i cili është në kërkim nga Policia. Martinaj ka thënë përpara hetuesve se ai nuk ka konflikte me të dhe ka marrëdhënie korrekte. Biznesmeni i lojërave të fatit ka pranuar se në lokal është ftuar prej Matës. “Unë nuk kam gisht në konflikt. Unë jam gjendur aty rastësisht, pasi jam thirrur nga Ervin Mata për një takim. Me këtë të fundit kam marrëdhënie normale, nuk kemi pasur konflikte. Kam qenë i shoqëruar me Gaxhën dhe me Eljon Hatën, por jam plagosur rastësisht, pasi nuk kam qenë pjesë e konfliktit”, mësohet të ketë thënë ndër të tjera për hetuesit Ervis Martinaj, shkruan Panorama.
Ai nuk ka dhënë shumë detaje për natyrën e konfliktit, apo për arsyen se përse Fabian Gaxha është konfliktuar me komandon Meviol Bilo dhe mikun e tij, Hoti. Megjithatë, Policia ka shoqëruar mbi 20 persona për t’i pyetur për ngjarjen në fjalë dhe nëse kanë dijeni për konflikte mes dy grupeve.
