Ish-presidenti i Republikës së Shqipërisë, Sali Berisha, si dhe të tjerë ish-presidentë të Shqipërisë, si Rexhep Mejdani, Alfred Moisiu, Bamir Topi, do të përfitojnë ambiente zyre, roje personale, staf mbështetës, banesë dhe tituj të përhershëm.
Kjo si rezultat i projektligjit të hartuar për institucionin e Presidentit, i zbardhur nga “Shqiptarja.com”. Nga këto privilegje do të përfitojnë edhe familjarët e presidentit dhe të ish-presidentëve.
Projektligji parashikon që ai person që ka shërbyer si President i Republikës së Shqipërisë, të mbajë përjetë titullin e Presidentit të Republikës. Përjashtim bëjnë rastet kur gjykata vendos për heqjen e këtij titulli.
Presidentit që ka përfunduar mandatin do i sigurohet edhe një sipërfaqe për banim pa pagesë, mbrojtje personale nga Departamenti i Personaliteteve, në varësi të Ministrisë përgjegjëse për rendin publik.
Ligji i ri parashikon që ish-presidentët të përfitojnë zyra dhe staf. “Presidenti i Republikës, të cilit i ka mbaruar mandati, përveç rastit të shkarkimit, ka të drejtë: (i) për ambient zyre deri në 100 m2 për kryerjen e aktivitetit të Tij; (ii) staf mbështetës të përbërë nga të paktën dy persona, dhe të drejtën e shfrytëzimit të makinës zyrtare dhe shoferit. Personat ndihmës të drejtat për marrëdhënie pune i realizojnë me institucionin e Presidentit të Republikës, ndërsa emërohen dhe shkarkohen nga Sekretari i Përgjithshëm, me propozim të ish kreut të shtetit, të cilit i ka mbaruar mandati. Shpenzimet për shfrytëzimin e makinës zyrtare përballohen nga buxheti i Presidentit të Republikës në detyrë”, citohet në ligjin e ri.
Veç këtyre, neni 64 i këtij ligji parashikon që pas mbarimit të funksionit, ish-presidenti i Republikës dhe anëtarët e tjerë të familjes ruajnë privilegjet dhe pasaportat diplomatike. Ai ka të drejtën e shpenzimeve materiale për realizmin e aktiviteteve të tij, shpenzime që sigurohen nga buxheti i shtetit.
“Në rast të vdekjes së Presidentit të Republikës pas mbarimit të mandatit, pensionin e përcaktuar në këtë ligj, të zvogëluar në masën 50%, e gëzojnë bashkëshortja e tij dhe fëmijët e mitur, deri në mbarimin e shkollimit të rregullt, respektivisht deri në moshën 25 vjeçare”, citohet më tej. Ligji i ri parashikon që në rast sëmundje, shpenzimet mjekësore të tij dhe të familjes i mbulohen nga buxheti i shtetit. (XH.A/SHUPLAKA)
