Të tjera detaje janë zbuluar nga marrëveshja mes kreut të opozitës Lulzim Basha dhe aleatëve të tij, lidhur me listat e kandidatëve për deputet, me të cilët do të garojnë në zgjedhjet e 25 qershorit.
Mësohet se Fatmir Mediu, Agron Duka dhe Vangjel Dule, do të jenë në pozicione fituese në listat e PD-së.
Ndërsa Ndoka dhe Shehu vetë do vendosen në vende fituese, por kanë edhe nga 2 persona në vende jo fituese. Ndoka do të garojë në Shkodër ndërsa Shehi në Tiranë. Sakaq, Dule do të ketë edhe një kandidat në Vlorë.
Kështu jashtë listave ka mbetur vetëm Kreshnik Spahiu, i cili vetëm një orë më parë deklaroi se Basha e kishte thyer në besë dhe i kishte lënë vetëm një afat kohë për të rishikuar vendimin. Mirëpo kjo kohë ka kaluar dhe siç duket, Spahiu do të garojë i vetëm, nën siglën e Aleancës Kuq e Zi.
Kujtojmë se mesnata e sotme është dhe afati i fundit i dorëzimit të listave në KQZ. Në fakt, marrëveshja e sotme, u arrit në momentet e fundit, pasi dukej sikur edhe Mediu do ngelej jashtë listave të PD-së. Në dy takime të organizuara sot, PR-ja vendosi që të regjistrohet e vetme në KQZ për shkak të mos rënies dakord me Bashën. Madje edhe pas takimit me kryeopozitarin Basha, Mediu është shprehur se nuk ka ende një marrëveshje.
Por mesa duket ata kanë rënë dakord në orët e fundit që kanë mbetur në dispozicion për PD-në, që të dorëzojë listën me kandidatët e saj për zgjedhjet e 25 qershorit në KQZ. (D.D/Shuplaka)
Discussion about this post