Fax News ka zbardhur projekt-rezolutën që do të diskutohet nesër në Kuvend në lidhje me propozimin e presidenti Ilir Meta për zgjedhjen si anëtare të Gjykatës Kushtetuese Marsida Xhaferllari.
Në projekt-rezolutën e siguruar nga Fax News, theksohet se ky është një akt i nxjerrë jashtë kompetencës kushtetuese të Presidentit dhe minon rifillimin e funksionimit të Gjykatës Kushtetuese.
Na arsyetimin e publikuar në projekt-rezolutë Kuvendi e quan të pavlefshëm dekretin e nxjerrë nga presidenti dhe si i tillë sipas tij konsiderohet nul.
“Kuvendi i Shqipërisë vlerëson se Dekreti i Presidentit është një akt absolutisht i pavlefshëm, i nxjerrë në mungesë të kompetencave kushtetuese dhe ligjore të institucionit të Presidentit dhe si i tillë ai konsiderohet nul dhe sikur nuk ka ekzistuar asnjëherë.”
Kuvendi po ashtu i ka kërkuar Komisionit hetimor shqyrtimin e kërkesës së 55 deputetëve të Kuvendit për shkarkimin e Presidentit të Republikës që të përmbyllë punën e tij brenda afatit të caktuar në vendimin e Kuvendit datë 03.10.2019, si dhe të marrë në konsideratë gjatë punës së tij edhe këtë situatë të krijuar nga Presidenti në lidhje me emërimin e anëtarëve të Gjykatës Kushtetuese.
“Kuvendi i Shqipërisë i bën thirrje Gjykatës Kushtetuese dhe të gjitha organeve publike që ngarkohen nga ligji me detyra në kuadër të funskionimit të Gjykatës Kushtetuese të zbatojnë me përgjegjshmëri dhe përgjegjësi detyrat e tyre dhe të mos zbatojnë Dekretin e Presidentit nr.11350, datë 13.11.2019.
Kuvendi i Shqipërisë i kërkon Komisionit hetimor për shqyrtimin e kërkesës së 55 deputetëve të Kuvendit për shkarkimin e Presidentit të Republikës të përmbyllë punën e tij brenda afatit të caktuar në vendimin e Kuvendit datë 03.10.2019 dhe të marrë në konsideratë gjatë punës së tij edhe këtë situatë të krijuar nga Presidenti në lidhje me emërimin e anëtarëve të Gjykatës Kushtetuese.
Kuvendi i Shqipërisë i bën thirrje Presidentit të Republikës të ushtrojë detyrat e tij kushtetuese në lidhje me fillimin e detyrës së gjyqtareve kushtetuese Znj. Arta Vorpsi, Znj. Elsa Toska dhe Znj. Fiona Papajorgji.”- thuhet në projekt-rezolutën e Kuvendit.
Ditën e djeshme presidenti Ilir Meta dekretoi anëtaren e re të Gjykatës Kushtetuese, Marsida Xhaferllari.
Ndërkohë pasditen e sotme Meta ka thërritur për betim 3 anëtare të zgjedhura dhe të dekretuara për KED-në, duke përjashtuar emrin e Arta Vorpsit, e cila bëri betimin e sotëm te noterja.
Nuk dihet ende nëse kandidatet do të paraqiten te Meta, ndërsa mes emrave është Marsida Xhaferllari, e cila u dekretua nga kreu i shtetit për anëtare e Gjykatës Kushtetuese.
(M.Q/Faxweb.al)
