Zbardhet propozimi i PD-së, sa vite burg do kërkojë opozita për shitblerjen e votës

Është zbardhur mbledhja e Grupit Parlamentar të Partisë Demokratike, ku kryetari Lulzim Basha ka bërë një përmbledhje të rezultatit të marrëveshjes së 18 majit me kryeministrin Edi Rama. Në këtë mbledhje, duke u ndalur tek ndryshimet e Kodit Penal, opozita u përqëndrua në masën e dënimit ndaj atyre që mund të merren me shitblerje vote më 25 qershor.

Shitblerja e votës do të dënohet me burg, nga 1 deri në 7 vite burg. PD thekson se kjo masë ndëshkimore do të jetë e paamnistueshme.

Më tej, opozita ndalet në masat ndëshkimore ndaj autoritetit policor, ndaj përdorimit të mjeteve publike, e të tjera vepra penale.

Deklarata e Partisë Demokratike:

Kryetari i Partisë Demokratike Lulzim Basha mblodhi grupin parlamentar, ku bëri një përmbledhje të rezultatit të marrëveshjes politike të 18 majit.

Duke folur për ndryshimet që janë bërë në Kodin Penal, në Ligjin e Medias dhe në Ligjin e Financimit të Partive, Basha u ndal në pikat kryesore që kanë të bëjnë me garantimin e votës së lirë.

Shitblerja e votës do të dënohet në mënyrë taksative nga 1 deri në 7 vite burg. Nuk do të ketë masa ndëshkimore si gjoba por vëtm burg për ata që do të tentojnë tjetërsimin e vullnetit të lirë të votuesve shqiptarë. Kjo vepër penale, do të jetë e paamnistueshme.

Do të dënohet nga 1 deri në 7 vite burg marrësi dhe dhënësi i kartave të identitetit.

Shpërdorimi i autoritetit policor për të influencuar në mbështetjen e një partie politike do jetë veper penale dhe të dënohet deri në 5 vjet burgim.

Përdorimi i të mjeteve publike, veprimtarisë shtetërore apo i burimeve financiare ose njerëzore, për zgjedhje, do dënohet vetëm më burgim, nga 1 deri ne 4 vjet.

Ashpërsim të dënimeve për të gjitha veprat e tjera penale në fushën e zgjedhjeve, duke i parashikuar të gjitha si krime.

Gjithashtu, do të forcohen rregullat për të mbikqyrur financimin e partive dhe ndalimin e financimeve të paligjshme.

Të gjitha këto masa dhe ndërhyrje, bëhen për të garantuar qytetarët shqiptarë nga presinet dhe shitblerja e votës dhe garë të ndershme për partitë politike në fushatën zgjedhore.

Këto ndryshime, së bashku me ministrat teknikë, kreun e ri të KQZ dhe Avokatin e Popullit, rezultat i marrëveshjes politike të 18 majit, do të miratohen sot në seancën e pasdites në Kuvend.

(XH.A/SHUPLAKA)