Kryetarit të Kuvendit Gramoz Ruçi mblodhi sot Konferencën e Kryetarëve e Kuvendit të Shqipërisë për të diskutuar lidhur me kërkesën e Grupit Parlamentar të Partisë Demokratike për ngritjen e Komisionit të Posaçëm Parlamentar për Reformën Zgjedhore.
Pas shqyrtimit të kërkesës së Grupit Parlamentar të Partisë Demokratike, Konferenca e Kryetarëve vendosi me konsensus miratimin e kërkesës dhe përgatitjen e projektvendimit për ngritjen e Komisionit të Posaçëm Parlamentar për Reformën Zgjedhore.
Kryetari Ruçi bëri me dije se në mbështetje të pikës 3, neni 24 brenda dy javëve nga diskutimi i Konferencës së Kryetarëve sipas propozimit që konferenca dakordëson për mbështetjen e kërkesës së grupit parlamentar të PD-së, duhet unifikuar qëndrimet lidhur me objektin, përbërjen dhe kohëzgjatjen e këtij komisioni.
Gjithashtu, u shqyrtua edhe kërkesa e Kryetarit të Grupit Parlamentar të Partisë Socialiste, Taulant Ballës për ndryshimin e rendit të ditës të seancës plenare.
Sipas kërkesës, propozohen të shtohen në rendin e ditës projektvendimi “Për miratimin e strukturës dhe organikës të Kolegjit të Posaçëm të Apelimit të Gjykatës Kushtetuese”, projektvendimi “Për miratimin e strukturës dhe organikës të Komisionit të Pavarur të Kualifikimit”, projektvendimin “Për miratimin e strukturës dhe organikës së Komisionerit Publik”.
Njëherësh Balla ka propozuar që të shkrihen në rendin e ditës dekretet 9765 datë 14.10.2016 për kthimin e ligjit “Për disa shtesa dhe ndryshime në ligjin. Për menaxhimin e integruar të mbetjeve të ndryshuar” dhe dekretin me numër 7969 datë 18.10.2016 “Për kthimin e ligjit “Për disa shtesa dhe ndryshime në ligjin për Dhomat e Tregtisë dhe të Industrisë së ndryshuar”.
Lidhur me këto propozime, Ruçi u shpreh se: “Në bazë të rregullores së Kuvendit, kjo është një çështje që i përket seancës plenare. Duke qenë se mbledhja ishte mbledhur posaçërisht për kërkesën e grupit parlamentar të PD-së, do t’ju bëja apel edhe kryetarëve të grupeve parlamentare dhe deputetët respektive të të gjitha grupeve parlamentare të jenë të gatshëm për të dhënë verdiktin e tyre për të 5-ta problemet, edhe për 3 vendimet edhe për 2 dekretet”. (J.V/Shuplaka)
