Zbulohen detajet e takimit mes Ministrit të Brendshëm Fatmir Xhafaj, me ambasadoren e Hollandës në Shqipëri, Dewi van de Weerd, e cila shoqërohej nga oficeri i kontaktit pranë misionit.
Tema e këtij takimi ka qenë lufta kundër kriminalitetit, drogës, vettingu dhe parandalimi i azilkërkimit.
Mësohet se ministri Xhafaj gjatë këtij takimi e njohu ambasadoren me prioritetet e Ministrisë së Brendshme në mandatin e ri qeverisës, që janë Vetting-u në Polici, lufta kundër drogës, krimi i organizuar dhe parandalimi i azilkërkimit. Po ashtu Xhafaj e njohu edhe me masat për forcimin e regjimit kufitar.
“Një tjetër masë, shtoi ministri, do të jetë forcimi i kapaciteteve njerëzore dhe niveli profesional në Pikat kufitare”, thuhet në njoftimin e ministrisë.
Nga ana tjetër, ambasadorja, ka vërejtur masat e ndërmarra nga Policia e Shtetit për frenimin e fenomenit të azilkërkimit.
Dy palët ranë dakord për të thelluar bashkëpunimin në luftën kundër krimit të organizuar, përmes intesifikimit të shkëmbimit të informacionit. Sipas ambasadores, Vetting-u në Policinë e Shtetit do të rrisë besimin e qytetarëve. (D.D/Shuplaka)
