Zbardhet vrasja e 56-vjeçarit në Shkodër, arrestohet i riu

Është zbradhur dhe dokumentuar ngjarja e ndodhur dje në fshatin Palaj të Dukagjinit, ku mbeti i vdekur Lazër Arraj.

Policia ka arrestuar 26-vjeçarin Marash Arra, kushëri me viktimën, ndërsa policia bën me dije se kjo ngjarje dyshohet të ketë ndodhur për konflikte të mëparshme mes familjeve.

“Nga strukturat e D. V. P. Shkodër nën drejtimin e Prokurorisë së Rrethit Gjyqësor Shkodër, falë një pune intensive hetimore dhe në bazë të informacioneve të marra në rrugë operative është bërë dokumentimi ligjor dhe arrestimi në flagrancë i autorit të dyshuar, shtetasit:

M. A., 26 vjeç, banues në fshatin Shtoj i Ri, Shkodër.

Arrestimi i tij u bë pasi dje më datë 21.10.2019 dyshohet se ka vrarë me armë zjarri shtetasin L. A., në fshatin Palaj, Njësia Administrative Shosh, Shkodër. Kjo ngjarje dyshohet të ketë ndodhur për konflikte të mëparshme mes familjeve.

Materialet iu referuan Prokurorisë së Rrethit Gjyqësor Shkodër, për veprat penale “Vrasja me paramendim” dhe “Armëmbajtja pa leje”.- njofton policia.

Lazër Arraj u gjet i vdekur nga nipërit e tij, ndërsa mësohet se ishte duke u kthyer për në Shkodër, ku ka edhe vendbanimin, ndërsa në fshat kishte qenë për të grumbulluar zahiretë e dimrit.