Zbardhja e ngjarjes në Shkodër, reagon Lleshaj: Hap drejt një qyteti të qetë dhe të sigurt

Ministri i Brendëshëm, Sandër Lleshaj ka folur për vrasjen e ndodhur në Shkodër të dy vëllezërve Bilali.

Sipas tij, zbardhja e plotë e ngjarjes është një hap drejt një Shkodre të re dhe të qetë, ku banorët të ndihen të sigurt dhe ku kriminalitetit të mos ketë shifrat aktuale.

Gjithashtu në shkrimin e bërë në Twitter ai ka përgëzuar Policinë e Shtetit për punën e kryer dhe Prokurorinë gjithashtu .

Kujtojmë që ngjarja ka ndodhur në datën 30 mars, ku Shkodra u zgjua e përgjakur nga vrasja e dy vëllezërve, Ibrahim dhe Astrit Bilali.

Ndërkohë që Policia e Shkodrës ka arrestuar dy të dyshuar për vrasjen e vëllezërve Bilali, bëhet me dije se hetimet ende vijojnë.

Personat e arrestuar janë Arsen Stojku dhe Myslym Rama, ndërsa i dyshuari kryesor sipas burimeve është Ibrahim Lici, të cilit i vranë xhaxhanë në Gusht të 2018, Fatbardh Lici.

Pista kryesore në të cilën po hetohet është ajo e hakmarrjes, pasi është e njohur përplasja mes fiseve Lici me fisin Bilali dhe Bajri, nga konflikti mes tyre vetëm vitin e fundit ka pasur 10 viktima.

Postimi i plotë i Lleshaj:

Zbardhja e vrasjes së dyfishtë të datës 30 mars në Shkodër është një tjetër hap drejt një Shkodre të sigurt, të qetë dhe të hijshme. Përgëzime për Policinë dhe Prokurorinë.