Për drogën me peshë 1.2 ton e cila kishte si qëllim trafikimin drejt Italisë, Prokuroria Shqiptare dhe autoritetet italiane kanë identifikuar edhe dy italianë të tjerë si pjesë të grupit.
Sipas Tv Klan emrat e tyre nuk bëhen të ditur, por për ta prokuroria ka kërkuar informacion nga autoritetet italiane. Një prej tyre dyshohet se është edhe pronari i velierës me të cilën po transportohej droga mbrëmjen e 19 Shtatorit të këtij viti në bregdetin e Semanit.
Po kështu Prokuriria ka dyshime se në këtë bandë janë të përfshirë edhe shqiptarë të tjerë dhe dyshon se Veliera do të shërbente për transportimin e lëndës narkotike, nga bregu në det të hapur.
Për faktin se varka turistike ka një motor të vogël e ka të pamundur për të kaluar me ngarkesën që kishte. Pasi të kishte dalë në det të hapur droga do të ngarkohej në një anije më të fuqishme, që do të kryente edhe trafikimin e saj drejt Italisë.
Këto fakte u bënë të ditura këtë të diel, në Gjykatën e Krimeve të Rënda, gjatë caktimit të masës së sigurisë ndaj dy të arrestuarve Xhovani Palladino e Veli Imeri. Palladino nuk pranoi të jepte deklarime para gjykatës. Nga ana tjetër, Veli Imeri pranoi se kishte qenë në barkë, por dinte se ngarkesa kishte qenë me cigare dhe jo me lëndë narkotike. (J.V/Shuplaka)
