Banorët e Astirit ndryshe nga netët e tjera janë nisur nga banesat e tyre drejt Drejtorisë së Policisë së Tiranës ku mbahen të arrestuar disa protestues midis të cilëve edhe ish-deputeti demokrat, Klevis Balliu.
Sapo kanë mbërritur para Drejtorisë së Policisë ata në shenjë proteste kanë djegur edhe goma dhe kanë bërë thirrje kundër qevrisë dhe Policisë së Shttit duke e akuzuar këtë të fundit se ka arrestuar protestues paqësorë.
Banorët kanë kërkuar lirimin e menjëhershëm të Klevis Balliut dhe tre protestuesve të tjerë të ndaluar gjatë protestës së djeshme.
Me thirrjet “Rama ik” banorët kanë nisur marshimin në këmbë nëpër rrugët e Tiranës të cilët janë vendosur më pas përballë Drejtorisë së Policisë.
“Ne do të qëndrojmë deri sa të japim frymën e fundit. Policia përdoret nga Edi Rama për të mbrojtur karrigen e vet, por nga ajo karrige do të bjerë shumë shpejt. Ne e kapëm Edvin Kristaq Ramën duke vjedhur me letra fallso”, tha njëri nga banorët.
Ndërkohë njëri nga protestuesit lajmëroi se nesër në orën 13:00 do të zhvillohet séance gjyqësore për Klevis Balliun dhe tre të arrestuarit e tjerë.
Ndërkohë Policia e Shtetit ka njoftuar gjatë paradites së sotme se ka nisur procedimin penal për 23 banorët e Astirit që protestuan dje paradite.
Po ashtu Policia shpall arrestimin e 4 personave, mes tyre dhe Klevis Balliu, pasi sipas pretendimeve kanë ushtruar dhunë dhe kanë kundërshtuar punonjësit e policisë. Po ashtu janë shpallur në kërkim dhe 3 persona të tjerë.
Duket se Policia e Shtetit po përpiqet që të shuajë me çdo formë protestën e banorëve të Astirit që prej 6 muajsh kanë dalë në rrugë në mbrojtje të pronave të tyre.
Gjatë ditës së djeshme, si pasojë e dhunës së policisë disa prej banorëve përfunduan në spital, me shenja helmimi dhe djegieje në fytyrë.
(F.GJ/FAXWEB.AL)
