Të tjera detaje zbulohen nga dëshmia e djeshme e deputetit socialist Jurgis Çyrbja, për procesin gjyqësor ndaj Emiliano Shullazit dhe katër të bashkëpandehurve të tij.
Përpara trupit gjykues, Çyrbja foli për takimet që kishte pasur me të pandehurin Shullazi gjatë vitit 2014. Ai mohoi që të jetë kërcënuar ndonjëherë prej tij.
Çyrbja është shprehur se kontaktet Shullazin dhe Gilmando Danin i kishte për shkak të funksionit të tij si drejtues i Hipotekës së Durrësit, pasi ishte angazhuar në regjistrimin e pronës ish-hotel “Vollga”.
Ndër të tjera, Çyrbja foli në veçanti për një takim që ka patur me Shullazin, në një lokal në zonën e Shijakut.
“Fillimisht më erdhi një urdhër për regjistrimin e pronës, por më pas erdhi një urdhër i dytë për kufizim veprimesh në lidhje me këtë pronë. Përpara mbylljes së procedurës, Ylvi Beqja më kërkoi të takoja edhe bashkëpronarin e kësaj prone. Ylvi Beqja më pas më mori në telefon dhe më tha ‘do të prezantoj edhe pronarin tjetër’. Jemi takuar në një lokal në zonën e Shijakut, pranë shtëpisë sime. Ai ishte Emiliano Shullazi. Ky person më pyeti nëse do ta regjistroja pronën me urdhër të zyrës qendrore të Hipotekës. I thashë se do të zbatoja ligjin”, tha dëshmitari.
Në dëshminë e zbuluar nga “Panorama”, Çyrbja ka folur edhe për telefonatat e tij me Gilmando Danin. Sipas dëshmitarit, Dani i kishte thënë se përse nuk po bëhej regjistrimi i saj, pasi të gjitha dokumentet ishin në rregull.
“Nuk më ka marrë njeri tjetër. Ka ardhur Ylvi Beqja, i cili interesohej, pasi erdhi shkresa për ‘kufizim prone’. Jam takuar edhe me Ilirian Muhon për këtë punë”, u shpreh Cyrbja. (D.D/Shuplaka)
Discussion about this post