Të tjera detaje bëhen me dije nga aksidenti ku është përfshirë deputeti i PDIU-së Aqif Rakipi. Policia ka bërë të ditur emrin e plotë të viktimës, që sipas Prokurorisë i ka prerë rrugën deputetit.
Viktima quhet Seit Sorra, është 54-vjeç, lindur dhe banues në Kus, Kashar. Mësohet se 54-vjeçari ka qenë tregtar i zones.
Në momentin kur ndodhi aksidenti, ai ka qenë duke ardhur nga Durrësi në Tiranë dhe sapo kishte zbritur nga një furgon duke tentuar më pas që të kalojë rrugën i ka dalë para makinës në të cilën udhëtonte deputeti.
Në detajet e bëra të njohura për mediat thuhet se deputeti nuk ka konsumuar alkool sipas testit të kryer nga Policia. Një fakt trondtitës është që në vendngjarje ka munguar Prokurori i gatshëm, pasi rezultonte që e kishte telefonin e fikur.
‘’ Ndërkohë është formuar grupi hetimor dhe është kërkuar ndërhyrja e Prokurorit të gatshëm, por nuk u mundësua lidhja nëpërmjet celularit, të cilin e kishte të fikur.
Në keto kushte u kryen veprimet e para hetimore në vendin e ngjarjes dhe gjatë kryerjes së veprimeve, u njoftua Prokurori i Rrethit Gjyqësor Tiranë, i cili pasi u informua për rrethanat dhe veprimet e para, kërkoi që krahas Ekspertit autoteknik të Policisë, të caktoheshin edhe dy ekspertë të tjerë autoteknik të jashtëm, me qellim kryerjen e një ekspertimi autoteknik me grup ekspertesh”, thuhet në njoftimin e Policisë. Ndërkohë Prokuroria ka vendosur që deputeti Rakipi të lirohet nga burgu dhe të gjykohet në gjendje të lirë. (D.D/Shuplaka)
