Zëdhënësja e PD-së, Ina Zhupa në një denoncim të bërë në llogarinë e saj në Facebook ka zbuluar rastin e një mjekeje të infektuar me COVID 19 në qendrën Shëndetësore në Kombinat.
“Si të gjithë mjekët e familjes, një nga doktoreshat e Qendrës Shëndetësore 6 në Kombinat, ishte lënë në vijën e parë të luftës vetëm me maskën e skaduar të qeverisë. Kjo është vetëm njëra anë e medaljes për tradhtisë ndaj personelit shëndetësor.
Ana tjetër është se Ministria e Shëndetësisë apo autoritetet e tjera, që varen prej saj nuk kanë bërë testin e asnjë kolegu të mjekes me COVID 19, me të cilët ajo ka patur kontakt të përditshëm. Për të gjurmuar persona që ka vizituar mjekja as që bëhet fjalë”, shkruan Zhupa.
Kjo e fundit gjithashtu ka theksuar me forcë dhe denoncimet e shumta që ka marrë nga qytetarët të cilëve nuk u bëhen testet pavarësisht simprtomave duke u vënë jetën në rrezik.
“Personelit shëndetësor në Qendrën Shëndetësore nr. 6 në Kombinat duhet t’i bëhet testi pa vonesë! Vetë Qendra duhet dezinfektuar në mënyrë që të mos bëhet burim infeksioni për stafin dhe qytetarët. Personeli shëndetësor dhe ai ndihmës duhet të pajisen me maska, me doreza, me dezifektues për punën e tyre të përditshme!”, përfundon Zhupa statusin e saj.
