Presidenti ukrainas Volodymyr Zelensky ka nënshkruar një dekret për të filluar tërheqjen e Ukrainës nga Konventa e Otavës e vitit 1997, e cila ndalon përdorimin, prodhimin, grumbullimin dhe transferimin e minave kundër personelit.
Gazeta Kyiv Independent raporton se kjo është një pikë kthese e madhe në politikën mbrojtëse të vendit, e cila erdhi në kontekstin e pushtimit rus dhe pas njoftimeve të ngjashme nga shtetet baltike dhe Polonia.
“Ky është një hap që realiteti i luftës e ka diktuar prej kohësh,” tha në Facebook deputeti ukrainas Roman Kostenko, sekretar i komisionit parlamentar të mbrojtjes, duke shtuar se Rusia, një vend jo-nënshkrues i traktatit, “po përdor masivisht mina kundër ushtrisë dhe civilëve tanë“.
Sipas Human Rights Watch, që nga viti 2022, Moska ka përdorur më shumë se një duzinë llojesh të ndryshme minash kundër personelit në tokën ukrainase. Përdorimi në shkallë të gjerë i këtyre pajisjeve ka lënë zona të tëra të pastruara të infektuara me eksplozivë, duke i bërë operacionet e çminimit jashtëzakonisht të rrezikshme.
“Ukraina nuk mund të luftojë më me duar të lidhura ndërsa armiku mbjell vdekje pa kufij,” përsëriti Kostenko. Dekreti i nënshkruar nga Zelensky, i cili zbaton një vendim të Këshillit të Sigurisë dhe Mbrojtjes Kombëtare, nuk është publikuar ende zyrtarisht. Hapi tjetër do të jetë miratimi në Parlament, por nuk është e qartë se kur do të hyjë në fuqi tërheqja.
