Gropa që la Zlatan Ibrahimovic te skuadra e LA Galaxy është shumë e madhe, pasi suedezi ka shënuar 53 gola në 58 ndeshje të luajtura në dy sezone gjatë kampionatit dhe fazës “play-off”. Ekipi amerikan ka hedhur grepat në Spanjë dhe ka gjetur marrëveshje me Javier “Chicharito” Hernandez.
Sulmuesi i njohur ka arritur marrëveshjen 3-vjeçare me skuadrën amerikane dhe do të kthehet në lojtarin më të paguar në MSL. Lojtari i Sevillas nuk ka gjetur shumë hapësira në La Liga këtë sezon duke luajtur vetëm 9 ndeshje në total, 4 si titullar dhe ka realizuar vetëm 1 gol.
Meksikani ka menduar të largohet nga kampionati spanjoll dhe të provojë një eksperiencë të re. Nuk dihet se sa Galaxy do të paguajë për kartonin e tij te Sevilla, por në krahun tjetër mediet amerikane bëjnë me dije se Chicharito do të jetë më i paguari në Amerikë.
