Niko Peleshi ka shkarkuar menjëherë nga detyra Drejtorin e Bordit të Kullimit në Korçë, Elbasan dhe Berat.
Kjo pas denoncimit të bërë nga ana e deputetit të LSI-së, Endrit Braimllari ku shihej se Nexhip Merolli ishte dënuar me vendim të formës së prerë nga ana e Gjykatës.
Në një reagim për mediat, ministri Peleshi sqaron se Ministria e Bujqësisë nuk ka pasur dijeni për dënimin e Nexhip Merollit me burg nga gjykata e Korçës me akuzën e falsifikimit.
“Qeveria e Shqiperisë s’ka pasur, s’ka dhe s’do të ketë asnjë lëkundje në mbrojtjen e pastertisë së figurës, së çdo zyrtari në varësinë e pushtetit ekzekutiv. Ministria e Bujqësisë dhe Zhvillimit Rural, falenderon dhe inkurajon çdokënd që hedh dritë mbi fakte të kësaj natyre, në funksion të moscënimit të figurës së zyrtarit të shtetit nga asnjë hije e të shkuarës në raport me ligjin”, thuhet në reagimin e ministrit të Bujqësisë.
Shkresa për emërimin e Nexhip Merollit si drejtor është firmosur nga ministri i Bujqësisë Niko Peleshi dhe mban datën 2o dhjetor 2017. Kështu pas një muaj drejtori e gjen veten të pushuar.
“Edi Rama emëron Drejtorin e Përgjithshëm të Bordit të Kullimit për rajonin Korçë, Elbasan, Berat shtetasin e dënuar me vendim të formës së prerë nga Gjykata e Rrethit Gjygjësor Korcë, Nexhip Merolli.
Kryeministri i Drogës riciklon të dënuarit në poste kyçe në administratën publike. Bashkëngjitur gjeni vendimin e Gjykatës dhe urdhërin e emërimit. Kjo është Rilindja e paligjshmërisë!”, shkruante Braimllari.
Merolli ka qenë i dënuar për veprën e falsifikimit të vulave, stampave dhe formularëve.
(E.K/FAXWEB)
