Zgjedhja e Presidentit të ri duket se ka zhvendosur vëmendjen nga mundësia e shtyrjes së zgjedhjeve. Rama dhe Meta prej gati një ore ndodhen në një takim te Kryesia e Kuvendit.
Ndërkohë pak orë pasi kreu i grupit parlamentar të Partisë Socialiste, Gramoz Ruçi, përmes një letre i kërkoi kreut të Kuvendit, Ilir Meta mbledhjen e Konferencës së Kryetarëve për nisjen e procedurave për zgjedhjen e presidentit të ri, ka ardhur edhe përgjigjja nga kryeparlamentarit.
Ilir Meta ka njoftuar se nesër në orën 10:00 do të mbledhë Konferencën e Kryetarëve për nisjen e procedurave për zgjedhjen e presidentit të ri.
Gramoz Ruçi i ka dërguar sot një letër zyrtare kryetarit të Kuvendit, Ilir Meta mbi përcaktimin e kalendarit për zgjedhjen e presidentit të ri. Mandati i Bujar Nishanit mbaron më 24 korrik.
Po sot, Drejtori i Shërbimit Juridik të Kuvendit Alban Brati i dërgoi një memo Metës ku e njofton për procedurat dhe afatet e zgjedhjes së Presidentit të Republikës një ditë para afatit të nisjes së procedurave.
Në letër thuhej se mandati i presidentit Bujar Nishani mbaron më 24 korrik 2017 ndërsa procedurat për zgjedhjen e Presidentit të ri, fillojnë jo më herët se 13 prilli 2017. Ndërkohë që ligji parashikon edhe procedurat në rastin e mbarimit të mandatit të Kuvendit aktual, i cili përfundon më 9 shtator të këtij viti. (E.K/SHUPLAKA)
Discussion about this post