Ditën e djeshme kryeministri Edi Rama ka deklaruar se Presidenti i ri i Republikës mund edhe të mos i përkasë Partisë Socialiste dhe maxhorancës.
Për këtë Rama u shpreh gjatë fjalës së tij me një grup pensionistësh, ku theksoi se maxhoranca i ka numrat në Parlament, por do të përpiqet për një president me mbështetje dhe mirëkuptim. “Ndonëse maxhoranca i ka votat për ta zgjedhur që në raundin e parë do të tentojmë që presidenti apo presidentja të jetë një figurë, e cila të ketë një mirëkuptim dhe mbështetje”, tha Rama.
Por presidenti Nishani kërkon një mandat të dytë dhe për këtë kërkon votat dhe vendimin politik të Lëvizjes Socialiste për Integrim. Në një intervistë për “Koha jonë”, kreu i shtetit, i cili mori votat e PD-së, LSI-së dhe PR-së, në zgjedhjen e tij pesë vjet më parë nuk beson në një pakt PS-PD për zgjedhjen e presidentit si një mundësi për të dalë nga protesta dhe bojkoti i Parlamentit për opozitën. “Unë jam zgjedhur në këtë post me propozimin dhe mbështetjen e Partisë Demokratike, Lëvizjes Socialiste për Integrim dhe Partisë Republikane.
Sot konfigurimi i aleancave në Kuvendin e Shqipërisë ka ndryshuar. Kam deklaruar se mbetem i gatshëm për të vijuar detyrën edhe në një mandat të dytë, por natyrisht që kjo varet nga Parlamenti. Unë nuk besoj në një pazar PS–PD, as PD–LSI. Por mund t’ju them në mënyrë publike dhe kategorike se nuk do ta pranoja të vijoja një mandat të dytë pa votat e LSI-së dhe kur them votat kam parasysh vendimin politik të kësaj force. Këtu besoj bien të gjitha hamendësimet”, tha Nishani. (J.V/Shuplaka)
